--Ads--
Patien ni House Deputy Speaker Ronaldo Puno a saan nga agballigi ti panggep a panangipila ti impeachment complaint kontra kenni President Ferdinand Marcos Jr.
Sigun kenni Puno, awan ti “grounds” wenno pangibasaran tapno maikkat iti puesto ti Presidente nangruna ket nasayaat met ti panangidaulona.
Sungbat daytoy ni Puno iti damag a panggep a mangipila ti impeachment complaint ni Congressman Kiko Barzaga kontra iti Presidente.
Agduadua metlaeng ni Puno nga adda ti mangsuporta iti ipila ni Barzaga.
Nupay kasta, impaganetget ni Puno a nawaya ni Barzaga a mangipila ti impeachment complaint.
Impaganetget ni Puno nga awan ti makitana a nainkalintegan a reklamo a mang-impeach iti Presidente.
Impetteng ni Puno a ti Presidente ket manarimaan ti panangrisutna kadagiti napateg nga isyu iti pagilian a nabuyogan ti pokus ken determinasion.
