Inlawlawag iti Palasyo Malacañang a saan pay ikonkonsidera iti presidente nga ikkaten ti intero a Department of Public Works and Highways (DPWH) nu di ket dagiti laeng opisyales daytoy a saan a mangtungtungpal kadagiti pagrebbenganda, dagiti aglablabsing, ken dagiti karaman iti korapsyon.
Sigun kenni Palace Press Officer Atty. Claire Castro, adu pay dagiti opisyales iti nasao a departamento a natitino ken mangtungtungpal kadagiti obligasyonda.
Innnayonna a nalaka laeng a maduktalan dagiti opisyales a nagbasol babaen metlaeng iti tulong ni DPWH Secretary Vince Dizon.
Maipalagip a daduma kadagiti district engineers iti nasao a departamento ti nairaman ti nagnaganda iti iregularidad kadagiti flood control projects nu sadino, naakusaran dagitoy a nangibulsa wenno nagnumar kadagiti binilbilyon a piso a nailatang kadagiti iggemda a proyekto partikular ti flood control.
Immuna metten a kinuna ni Dizon nga adu nga empleyado iti nasao a departamento ti posible a maikkat iti agtultuloy nga imbestigasyon kadagiti naanomalyaan a flood control projects.
