Maipaspasidong ita iti nainget nga ensayo ken training ni Team Lakay fighter a ni Carlo Buminaang para iti naituding a panagsublina iti MMA cage inton Nobiembre 8, 2025 idiay Bangkok, Thailand.
Makasango ti Bantamweight prospect ti undefeated submission artist a ni Elbek Alyshov nga addaan iti 9-0 record para iti undercard ti One 169 event ti One Championship.
Sigun iti Cordilleran rising star, papigsaenda ti ground game na tapno ma-counter ti wrestling ken submission skills ni Alyshov.
Daytoyen ti maika-siam a laban ti 31-anyo a ni Buminaang iti One Championship event manipud limmaban daytoy idi 2023 ken naikkan iti US$100,000 contract idi Mayo 2024.
Ti nasao a laban ket napateg iti karera ni Buminaang iti lubong ti Mix Martial Arts tapno maipangato ti ranking na iti 145lbs division.
Ti Cordilleran mix martial artist ket addaan iti professional fighting record a 7 wins ken maysa a pannakaabak.
Iti pito a panangabak ni Buminaang ket dua babaen iti knockout, sag-dua iti technical knockout ken submission ken addaan isuna iti 86% a finish rate.
