Opisyal a naiyuswat wenno nailukat ti National Correctional Consciousness Week 2025 a programa wenno aktibidad ti Bureau of Jail Management and Penology male ken female dormitory ti siudad ti Baguio.
Ti nasao nga aktibidad ket addaan iti tema a “Matatag na Paglilingkod, Makabagong Pamamaraan, Maunlad na Serbisyong Pampiitan” no sadino ket nakalinya metlaeng daytoy iti Bureau of Jail Management and Penology mantra a “changing lives, building a safer nation”.
Iti mensahe ni Jail Chief Inspector John Wayland Lapon, City Jail Warden ti Bureau of Jail Management and Penology male dormitory, daytoy nga aktibidad ket maipatpatungpal iti tinawen no sadino ket napintas a wagas daytoy para kadagiti Persons Deprived of Liberty.
Pinagyamananna met dagiti service providers a partners dagitoy nga agtultuloy a mangibingbinglay iti sasao ti Namarsua ken manglawlawag metlaeng kadagiti Persons Deprived of Liberty.
Kabayatanna, iti panakiuman ti Bombo Radyo kenni Jail Senior Inspector Erlinda Las-egan, Acting City Jail Warden iti female dormitory, ti nasao nga aktibidad ket tapnu makissayan ti iliw dagiti Persons Deprived of Liberty kadagiti pamilyada.
Malaksid iti dayta, ket maaddaan pay dagitoy iti namnama nga agbaliw ken agamiris nu man pay adda ti nagbasulan dagitoy ket adda paylaeng ti importansya dagitoy iti gobierno babaen ti panakipatungpal ti nagduduma nga aktibidad.
Kagiddan dayta, dumanon met iti 50 dagiti Persons Deprived of Liberty iti female dormitory no sadino ti kadawyan a kaso dagitoy ket ti panaglabsing iti RA 9165, illegal recruitment/estafa, panagtakaw ken dadduma pay.//Bombo Noveh Organo
