Opisyal itan a miembro iti Association of Southeast Asian Nations (ASEAN) ti Timor-Leste (East-Timor) kalpasan ti 14 a tawen a matartarigagayan daytoy.
Iti panakaingato iti bandera iti East Timor kabayatan iti ASEAN Summit idiay Kuala Lumpur,Malaysia idi kalman ket pormal a nagbalin a maika-11 a miembro iti nasao nga organisasyon daytoy.
Sigun kenni Prime Minister Xanana Gusmão,daytoy ket maysa a pakasaritaan para iti baro a pagbaliwan iti Timor-Leste.
Impeksa met ti presidente daytoy a ni Jose Ramos-Horta ti ragsakna para iti panakairaman iti nasao a pagilian iti ASEAN a nabayagen a panggepda para iti ad-adda pay a panakaparegta iti panakaitinnulongda kadagiti pagilian iti abagatan a daya nga Asya.
Iti baet a bassit laeng ti ekonomiya iti Timor-Leste, mangnamnama ti gobyerno daytoy a babaen iti panakipasetda iti ASEAN ket aglukat dagiti ad-adu pay nga iportunidad para iti ekonomiya.
