Natiliwan ti maysa nga ama nga agtaktakaw ti maysa a kahon ti gatas nga agdagsen ti 1.725 kilograms para iti anakna a maladaga.
Sigun iti Tabuk City Police Station, napasamak ti insidente iti Talavera Supermarket itay laeng kallabes.
Naiturn-over iti Tabuk PNP Sub-Station 2 ti lalaki idiay Barangay Bulanao, Tabuk City, Kalinga babaen kadagiti empleyado ti supermarket.
Bayat ti imbestigasion, naduktalan a ti suspek ket ‘single dad’ nga agay-aywan iti maladaga nga anakna.
Kinuna ti suspek nga awan ti trabahona kalpasan a nagleppas ti konstraksion a pagtatrabahuanna, ken nabati nga agmaymaysa kaduana ti maladaga kalpasan a binaybay-an ida ni baketna.
Kalpasan a nangegan dagiti imbestigador ti kinuna ti ama, nagdesision ni Police Lieutenant Colonel Jack E. Angog, a maysa metlaeng nga ama, a tulungan ti suspek babaen ti panagbayad iti tinakawna a gatas tapno saanen a maibalud daytoy.
Gapu iti dayta, saanen a nakasuan ti ama ken pinalubusanda nga agawid tapno kitaen ti anakna a maladaga.
“Upon learning the circumstances behind the incident, PLTCOL JACK E ANGOG, himself a father, felt empathy toward the suspect. He settled the amount of the stolen item to prevent the suspect from being imprisoned and give him a chance to start anew.”
STATEMENT OF TABUK CITY POLICE
