Mabalinen a kiddawen ti publiko pakairamanan dagiti kameng iti media ti kopya iti statements of assets, liabilities and net worth (SALN) dagiti opisyales iti gobyerno mangrugi inton November 15.
Daytoy ket kasaruno ti publication iti Memorandum Circular 3, series of 2025 nga impaiyulog ni Ombudsman Jesus Crispin Remulla a mangisubsubli iti akses iti publiko kadagiti SALN maitunos iti publication requirement nga imanmandato iti Civil Code.
Iti sidong iti direktiba ni Remulla, dagiti SALN request ket kasapulan a maipila iti Public Assistance and Corruption Prevention Office (PACPO) iti central office iti ombudsman wenno iti maseknan a Public Assistance and Corruption Prevention Bureau (PACPB).
Amin a SALN request ket mabalin a mapatgan malaksid laeng kadagiti sumagmamano a limitasyon kas iti gundaway a ti ombudsman ket saan a repository iti makidkiddaw a SALN, nu ti dokumento ket awan kadagiti files, nu maaramat daytoy para iti saan nga otorisado a commercial purposes, ken nu ti nagkiddaw ket addaan iti rekord a nang-misuse iti kapada a dokumento wenno paset daytoy iti harassment, extortion wenno pangta.
Malaksid iti dayta, mabalin metlaeng a saan a mapatgan ti kiddaw nu ti pakabigbigan ti nagrequest ket fictitious ken nu saan a maitunos iti paglintegan, morals wenno public policy ti pakaaramat daytoy.
