Dumanon iti agarup 10 a pagadalan sadiay Iloilo City ti nakaawat ti bomb threats babaen ti electronic mail (e-mail) wenno social media pages.
Sigun kadagiti maseknan nga indibidual a saan a nainaganan, nakaaawat ti Iloilo National High School (INHS) ti bomb threat babaen ti e-mail ken Facebook pages ti 12:26 a.m. idi Lunes, November 17, 2025.
Naipatulod ti bomb threat babaen ti social media account a “Nestor Villagracia.”
Pagarupen dagiti maseknan a naipatulod ti bomb threat gapu iti saan a patas a panangtrato ti faculty member.
Sigun kenni Delorah Cecilia Fantilla, principal ti Iloilo National High School, saanen a masarakan ti Account a nangipatulod ti bomb Threat bayat ti panang-stalk ti ICT dagitoy.
Kabayatanna, nakaawat met ti isu metlaeng a pangta ti West Visayas State University (WVSU) Main Campus; Iloilo Science and Technology – University Main Campus; Guimbal National High School idiay Guimbal, Iloilo; Colegio de San Jose ; Central Philippine University; Colegio de San Jose idiay Jaro; Saint Therese MTC Colleges idiay La Paz District, ken Iloilo Merchant Marine School idiay Pavia, Iloilo.
Kinuna ni Dr. Joselito Villaruz, presidente ti WVSU a nainget ti pannakikoordinar dagitoy kadagiti kameng ti Philippine National Police ken dadduma nga ahensia tapno maarestar ti adda iti likudan ti nasao a pangta.
Nakanselar metten ti Face-to-face classes ken trabaho kadagiti apektado a pagadalan.
Sigun iti Commission on Higher Education (CHED), mapaka-alarma dagiti adu a bomb threats.
Impasigurado met ni Major Lailyn Sencil, spokesperson ti PRO 6 nga agtultuloy ti imbestigasion dagitoy babaen ti koordinasionda iti Regional Anti-Cybercrime Unit (RACU), ken Iloilo City Police Office tapno maammuan ti suspek.
