Agpatpataming iti ospital ti maysa nga Overseas Filipino Worker (OFW) kalpasan a nauram ti pito a high-rise building iti Tai Po District sadiay Hong Kong.
Sigun iti Overseas Workers Welfare Administration (OWWA), kaddua a naiturong iti ospital ti nasao a Pilipino dagiti amo, ken ti ay-aywananna a maladaga.
Nakompirmar met a natalged ti kasasaad dagiti 19 a dadduma pay a Pilipino.
Kabayatanna, naamuan nga agarup 70 agingga 80 nga OFW ti rehistrado iti address iti nauram a housing complex.
Agtultuloy met ti panangasistar ti Gobierno ti Pilipinas kadagiti 23 a Filipino domestic workers a naapektaran iti uram.
Mainaig iti dayta, awan paylaeng ti kompermasion no adda ti Pilipino a na-trap iti uneg ti pasdek ngem maysa ti mapukpukaw.
Maipalagip a dumanon iti 83 dagiti pimmusay bayat a 300 a tattao ti mapukpukaw gapu iti napasamak nga insidente.
