Inwaragawag ti Land Transportation Office (LTO) a mangrugi a maiparit intun Desiembre 1, 2025 dagiti e-bikes ken e-trikes kadagiti main roads.
Sigun iti nasao nga ahensia, makompiskar dagiti lugan ti siasino man nga aglabsing iti daytoy.
Nupay kasta, kinuna ni Senador JV Ejercito, sponsor iti 2026 budget ti Department of Transportation (DOTr) a saan paylaeng a maipatungpal a dagus ti pannakatiliw gaputa mangisayangkat pay ti LTO iti information drive.
Inlawlawag ni Senator Ejercito a maiparit dagiti nasao a lugan kadagiti main roads ngem mabalin kadagiti Barangay ken subdivisions.
Maipalagip a sakbay daytoy, imbutaktak ni Senador Raffy Tulfo iti interpellation dagiti naawatna a reklamo kontra kadagiti e-bikes.
Inlawlawag ni Tulfo a saan a kontra iti panagaramat ti e-bikes ngem kinunana a mangitunda daytoy iti aksidente.
