Indeklara iti Fifth Division ti Sandiganbayan a maysa a pugante wenno fugitive ni sigud nga Ako Bicol party-list representative Elizaldy “Zaldy” Co ken dagiti tallo nga ehekutibo iti Sunwest Inc.
Pinatgan ti specialized anti-graft court ti mosyon ti prosekyusyon nga ideklara a pugante dagiti nadakamat nga indibidwal bayat a saan pay naiserbi ti arrest warrant kadagitoy.
Sigun iti prosekyusyon, nalawag nga itartarayan ni Co ti hustisya a mabalin a paneknekan ti saanna a panangikaso iti bilin iti Kamara nga agawid daytoyen.
Maipalagip nga impaayan ni House Speaker Bojie Dy iti sangapulo nga adaw pawayway idi ni Co tapno makasubli iti Pilipinas ngem kasaruno dayta ket naglusulos daytoy kas miembro iti lower chamber ti Kongreso.
Malaksid iti dayta, maysa metlaeng a makitkita a rason ti saanna a panangpansin kadagiti subpoena tapno umatendar iti panagdengngeg iti Independent Commission for Infrastructure (ICI) ken ti saanna a panangisumitir kadagiti counter-afficadavits tapno idepensa ti bagina manipod kadagiti akusasyon kontra kenkuana.
Kabayatanna, immunan a naipakammo ti panakakanselar iti pasaporte ni Co,maysa a tignay a napateg para iti nalaklaka a panakaisublina iti pagilian sigun iti Sandiganbayan.
