Temporaryo a nagleppas idi kalman ti tallo nga aldaw a tigil-pasada nga indauloan iti transport group Manibela.
Dumanon iti agarop 20,000 a jeepney drivers ti nakikaykaysa iti daytoy.
Sigun iti Manibela,nangngeddeng dagitoy nga isardeng paylaeng ti nasao a tignay-protesta kalpasan a nangipaay ti Land Transportation Franchising and Regulatory Board (LTFRB), Land Transportation Office (LTO), ken ti Department of Transportation (DOTr) kadagiti komitment kabayatan ti nasao a tignay.
Kinuna ti grupo a nagballigida a maala ti atensyon ken kari nga aksyon dagiti maseknan nga ahensya iti gobyerno pakairamanan ti panagkari dagiti opisyal nga iruar dagiti pending jeepneys, license plates, ken drivers’ licenses dagiti naapektaran nga operators.
Malaksid iti dayta, kinuna pay ti Manibela a nagkomit metlaeng dagiti maseknan nga otoridad a mangipaiyulog iti memorandum circular a mangilaylayon iti Provisional Authority dagiti operators, kasta metten ti panakaimbestigar ti matap a payola kadagiti tallo a nadakamat nga opisina.
