Idagdagadag ti Philippine National Police (PNP) kadagiti local government units (LGUs) nga idesignar dagitoy dagiti firecracker zones para iti kinatalged ti publiko bayat ti holiday season.
Malaksid iti dayta, imbilin ni PNP acting chief Police Lieutenant General Jose Melencio Nartatez Jr. kadagiti local police units a paingeten pay dagitoy ti operasyonda kontra iti panagilako kadagiti illegal firecrackers.
Sigun kenkuana, napateg ti panangidesignar dagitoy iti lugar a pakaipatungpalan iti panagpaputok tapno maliklikan ti aksidente, maregulate ti panagilako ken tapno matulungan metlaeng dagiti legitimate small businesses.
Kinunana pay a saan dagitoy nga agduadua a mangipila iti kaso kontra kadagiti aglabsing iti linteg.
Innayonna pay a nainget nga ipatungpalda dagiti safety standards nga intuding ti Firearms and Explosives Office (FEO), no sadino kasapulan nga amin dagiti firecracker stalls ket nasken nga addaan-da iti permits, imintenir ti umno nga storage facilities ken agilakoda laeng kadagiti produkto nga addaan iti label.
