Nagpakdaar ti Philippine Space Agency (PhilSA) iti panangipatayab manen ti China iti Long March Rocket 7A inton Disiembre 31, 2025.
Sigun iti PhilSA, agtaud ti rocket iti Space Launch Site sadiay Wenchang, Hainan China.
Gapu iti dayta, posible a matnag iti taaw ti Pilipinas dagiti sumagmamano a rocket debris a posible a mangitunda iti pangta wenno peggad iti biag ken sanikua.
Karaman kadagiti posible a drop zone ti 45 miles manipud iti Burgos, Ilocos Norte; 67 miles manipud iti Dalupiri Island, Cagayan; 64 miles manipud iti Sta Ana, Cagayan, ken 76 miles manipud iti Camiguin Norte.
Iti baet a saan a nakaro ti posible a pannakadadael gapu kadagiti matnag a debris, kinuna ti PhilSA a kasapulan ti kanayunan a panagannad, nangruna kadagiti agturong iti taaw.
Maibalakad kadagitoy a liklikan dagiti nadakamat a drop zone manipud 6:32 agingga iti 7:14 a.m. inton Dis. 31.
