Nakasagana ti provincial government iti Albay para iti sapasap a panakaibakwit dagiti nasurok 70,000 a residente manipod kadagiti maap-apektaran a lugar gapu iti pangta iti panagalburoto iti Bulkang Mayon.
Daytoy ket kasaruno ti pakdaar a posible a maingato iti alert level 4 ti nasao a bulkan nga iti agdama ket naipasidong paylaeng iti alert level 3.
Sigun kenni Albay Governor Noel Rosal, imbilinnan ti dagus a panakaisimpa dagiti evacuation centers kadagiti nagduduma a lugar iti nasao a probinsya tapno maipanamnama a natalged ken komportable ti pagakaran dagiti maibakwit.
Malaksid iti dayta, impetteng ti gobernador ti kinapateg ti responsable a panakaaramat iti calamity fund rason nga impanamnamana a maaramat dagiti pondo iti wagas a nasayaat ken epektibo tapno maipaay ti pagkasapulan dagiti apektado a residente.
Mainaig iti dayta, impasigurado met iti Department of Social Welfare and Development (DSWD) nga umdas ti suplay dagiti food packs iti agingga innem a bulan a maiwaras kadagiti bakwit.
Iti agadama, agtultuloy paylaeng ti panagmonitorda kadagiti aktibidad iti Bulkang Mayon nga itay nabiit ket nangiruar kadagiti uson wenno pyroclastic density curent ken napasaran metlaeng ti ashfall.
