TABUK CITY – Boluntaryo a simmuko iti Kalinga Police Provincial Office dagiti dua a balud a naglibas manipud iti Tabuk City Police Station idi January 4, 2026.
Dagiti simmuko a balud ket da Andres Benito Jr., 35-anyos ken Michael Macagne, 39-anyos, agpada a residente ti Purok 1, Bulanao, Tabuk City.
Simmuko dagitoy idi malem kalman, January 15 idiay Camp Capt. Juan M. Duyan iti sidong ti panangidaulo ni PCOL Gilbert A. Fati-ig, Officer-in-Charge ti Kalinga Police Provincial Office.
Maipalagip a naglibas dagiti dua a balud iti detention facility usar ti bassit a hacksaw blade tapno dadaelan ti metal railings ti selda.
Naibalud dagitoy idi Disyembre 17, 2025 gapu iti panaglabsingda iti R.A. 9165 wenno ti Comprehensive Dangerous Drugs Act of 2002 ken ti R.A. 10591 wenno ti Comprehensive Law on Firearms and Ammunition.
Gapu iti panaglibas dagitoy, inikkat iti pwesto ti Philippine National Police ni PLtCol. Jack Angog, ti agserserbi kas City Chief of Police ti Tabuk City Police Station idi daydi a panawen.
Iti agdama ket naisubli iti Tabuk City Police Station dagiti dua a simmuko a balud para iti umno a disposisyon ken kanayonan nga imbestigasyon iti panaglibas dagitoy.
