Impakaammo ti Philippine National Police (PNP) nga adadda a paingeten ken papigsaenda ti manhunt operation para iti pannakasarak kenni Sen. Bato Dela Rosa kasaruno iti panagleppas ti maysa a lawas nga ultimatum tapno sumuko ti nasao a senador ita nga aldaw.
Sigun kenni PNP Deputy Chief for Administration Lieutenant General Wilson Lopez, supervisor ti manhunt para kenni Sen. Bato, patienda nga adda paylaeng iti uneg ti pagilian ti senador kas maibasar iti kaudian a datos ti Bureau of Immigration (BI).
Impeksana metlaeng a saanda nga agsardeng a mangsarak kenni Senator Dela Rosa ken paingetenda ti operasyonda.
Imbinglay metlaeng ni Lopez a tartarimaanenda metten ti tracker team da kasta metten a nangbukeldan kadagiti task groups iti national ken regional levels tapno masarakan ti lokasyon ti senador.
Maipalagip nga agleppas ita ti maysa a lawas ng impaay ti Department of the Interior and Local Government (DILG) nga ultimatum para kenni Sen. Bato tapno sumuko kadagiti otoridad.
