Kinumpirmar ni Department of Public Works and Highways (DPWH) Secretary Vince Dizon a kamali dagiti adu kadagiti flood control project coordinates nga insumitir ti sigud a dadaulo ti nasao nga ahensya a ni Manuel Bonoan iti Sumbong sa Pangulo website.
Nupay kasta, impetteng ni Dizon a saanna pay a maibaga nu daytoy ket ingagara ni Bonoan wenno pudno a nagkamali laeng.
Ti komento ni Dizon ket kasaruno ti kinuna ni Senate Blue Ribbon Committee Chairperson Panfilo Lacson a nakaawat daytoy iti mapagtalkan nga impormasyon seknan iti maatap a panangi-mislead ni Bonoan iti Palasyo kas paset iti cover-up.
Gapu iti dayta, inimbitaran ti nasao a komite ni Bonoan nga umatendar iti panagdengngeg inton Lunes ngem itay laeng nabiit ket nakumpirmar ti panagkiddaw daytoy ti pammalubos tapno mailaylayon ti panagtalinaedna idiay Estados Unidos bayat nga agpatpataming ti asawana.
Kagiddan dayta, inkari ti sigud a DPWH secretary nga agawid iti Pilipinas inton February 15.
