BAGUIO CITY- Napilaan iti kaso mainaig iti panagtakaw ti agtawen iti 19 a miembro ti LGBTQ, maysa a waiter, tubo sadiay Pangasinan ken residente iti siudad ti Baguio.
Maibasar iti report dagiti otoridad, tinakawan ti suspek ti agtawen iti 39 biktima a kasinnarak daytoy.
Nabigbig ti biktima a maysa a minero ken addaan iti ka live-in.
Iti imbestigasyon ti kapulisan, aglanglanga a babae ti suspek bayat ti pannagsinnarak dagitoy iti maysa a Terminal iti suidad ti Baguio.
Kamauddianna, nagturong dagitoy iti maysa a lodge sadiay Tuba, Benguet.
Bayat nga adda dagitoy ti uneg ti lodge, imbilin ti suspek nga agshower ti biktima.
Kalpasan dayta, insingasing ti suspek a mangan dagitoy.
Nagluganda iti Taxi, paturong iti siudad ti Baguio no sadino, ditoy a nadlaw ti biktima a mapukpukaw ti P23,000 a nilaon ti pitakana.
Pinagdua-duaanna ti suspek a daytoy ti nagtakaw iti nasao a kuarta.
Gapu iti dayta, kiniddawna iti driver ti Taxi nga agturongda iti Baguio City Police Office Station 2 tapno ireport ti napasamak.
Ditoy a narekober dagiti otoridad manipud iti suspek ti nasao a kuarta.
Naipaima ti kaso iti Tuba Municipal Police Station (TMPS) bayat a nairekomendar iti suspek ti P3,000 a piyansa.
Iti kaudian a report ti kapulisan, agtaltalinaed nga adda iti kustordiyada ti suspek gapu ti pending issuance of detention mittimus by a competent court.//Bombo Noveh Organo
