Inyusuat ti Philippine National Police (PNP) ti pannakaikkat dagiti karatula nga addaan iti nagan ken ladawan dagiti politiko kadagiti proyekto a pinunduan ti gobierno.
Sigun kenni PNP chief Police General Jose Melencio Nartatez Jr., paset daytoy ti panangsalaknib iti integridad ti public service.
Impetteng daytoy nga amin a proyekto ti gobierno ket saan nga agparang a kukua ti maysa nga indibidual.
Inyunay-unay pay ni Nartatez Jr. a ti panagaramat iti sanikua ti gobierno tapno maitampok ti maysa a personalidad ket panaglabsing iti prinsipio a ti public office ket maysa a public trust.
Gapu iti dayta, nabilin amin a personnel ti nasao nga ahensia nga ikkatenda amin dagiti signage, tarpaulin, marker, wenno material nga addaan iti nagan, imahe, initials, color motif, slogan, wenno anya man a pakabigbigan dagiti public officials a naikabil iti government-funded projects, programs, aktibidad, ken sanikua ti gobierno.
