KALINGA- Inlawlawag ni sigud a Kalinga Congressman Allen Jesse C. “Sonny” Mangaoang dagiti agawar-waras iti social media seknan iti maatap a ghost project sadiay Kalinga.
Sigun kenkuana, awan ti ghost ken substandard a project iti nasao a Probinsya kabayatan ti terminona.
Nupay kasta, inaklonna a dagitoy ket manarimaan ken madama a mailepleppas.
Inlawlawag ni Mangaoang a bumaybayag ti konstraksyon agsipudta, dadduma kadagiti indibidual a maapektaran ti loteda iti farm to market road ket saan a pabor.
Maatap a dadduma kadagitoy ti mangikamat iti buneng ken paltog no adda dagiti agtrabaho.
Dadduma met kadagiti umili ti agkidkiddaw iti bayad no maapektaran ti lote dagitoy.
Kabayatanna, kidkiddawen ti nasao nga opisial kadagiti umili iti nasao a lugar nga agkiddawda iti patas a presio agsipudta, dagitoy metlaeng ti agnumar kadagiti maaramid a kalsada.
Maipalagip a dumanon iti nasurok P5.5 Billion ti maatap a ghost project iti probinsia ti Kalinga.
Daytoy ket pakairamanan ti Chico River Mega Dike a napodoan iti agarup 5.5 Billion a flood control system no sadino, maatap a saan paylaeng a naileppas.
Maikadua ti Makilo Steel Bridge sadiay Tinglayan a 99% a nalpas ngem maatap nga awan ti nasayaat a pundasyon daytoy.
Karaman metlaeng iti maatap a ghost project ti Nambaran-Alliog Bridge sadiay Tabuk City a napondoan iti P106 Million.
Inlawlawag ni sigud a Kalinga Congressman Mangaoang a mabalin nga agturong dagiti umili ti Kalinga iti opisina ti DPWH Kalinga tapno iberipikarda dagiti nadakamat a proyekto.//Bombo Jerwin Aquino
