Pimmusay ti maysa a menor-de-edad, highschool student, ken residente ti munisipyu ti Tuba, Benguet kalpasan a nadungpar iti L300 a lugan nga imanmaneho ti kuarentay-anyos a lalaki, maysa a vendor ken residente ti Irisan, Baguio City, itay nabiit.
Maibasar iti report ti pulisya, napasamak ti insidente iti Marcos Highway, Tuba, Benguet.
Iti imbestigasion ti pulisia, pasang-at ti nasao a lugan iti siudad ti Baguio.
Ginandat ti driver ti L300 nga overtaken ti maysa a bus ngem aksidentena a nabangga ti biktima nga agdaldalyasat a nagtaud manipod iti Northbound right shoulder.
Gapu iti pannakadungpar ti biktima, nagsagrap daytoy iti head injury ken napukawna ti puotna.
Dagos nga inturong met ti pulisia ken Tuba BFP iti ospital para iti pannakatamingna ti biktima ngem pimmusay latta daytoy gapu iti severe traumatic brain injury.
Napilaan ti kaso a Reckless Imprudence Resulting in Homicide ti driver nga addaanen iti nairekomendar a piansa a P30,000.
Iti kaudian a report dagiti otoridad, nawayawayaan daytoy kalpasan a nakapagpiansa iti nasao a gatad.|via Bombo Noveh Organo
