Nangiruar ti Sandiganbayan iti precautionary hold departure order wenno PHDO kontra kenni Benguet Representative Eric Yap ken iti kabsatna a ni sigud nga ACT-CIS party-list congressman Edvic Yap, sigun kenni Assistant Ombudsman Mico Clavano.
Impaayan iti anti-graft court ti Verified Ex Parte Application iti Office of the Ombudsman para iti panangipaay iti isyu iti hold departure order, kas maitunos iti 2018 Revised Internal Rules iti Sandiganbayan. Sigun iti resolusuon idi Marso a tres, ti pammilin ket saan a makaapektar iti agbalin a resulta iti umuna nga imbestigasion iti Office of the Special Prosecutor.
Maibasar iti aplication iti Ombudsman, indatag ti resolusyon iti Anti-Money Laundering Council a mangibagbaga nga adda iti beneficial ownership, kontrol ken pinansial nga interes ti agkabsat iti Silverwolves Construction—contrator iti dua lebel iti mapapati a saan a nalpas a flood control projects idiay La Union nga aggatad iti sag-P89.7 milyon.
Immunan a nangiruar iti freeze order ti Court of Appeals kontra kadagiti sanikua iti agkabsat seknan iti mapapati a flood control kickback scheme.
Mapapati a rimmuar metlaeng iti umuna nga imbestigasion iti AMLC a nakaawat ti Silverwolves Construction iti P16.6 bilyon a deposit manipod iti Department of Public Works and Highways manipod idi tawen 2022 agingga 2025—gatad a nangatngato iti P3.1 bilyon a government contracts a naala iti kompania manipod idi tawen 2023 agingga 2025.
Sigun iti Sandiganbayan, ti kinadakkel iti gatad a karaman ken ti posible a nadagsen a pannusa ket umdas a basaran tapno maipatungpal iti precautionary measure, nangruna ta adda kabaelan nga agbiahe ken adda access iti resources dagiti respondent.
Iti baet daytoy, awan pay ti naipila a kaso a kriminal kontra iti agkabsat. Idi Oktubre 2025, kinuna ni Ombudsman Jesus Crispin Remulla a person of interest ni Eric Yap iti nasao a proyekto ken mabalin nga adda ti conflict of interest nga aglablabsing iti Republic Act 3019 wenno Anti-Graft and Corrupt Practices Act.
Iti sabali a bangir, inpetteng ni Clavano a precautionary measure ti PHDO kabayatan ti preliminary investigation phase tapno masigurado a saan a makaruar ditoy pagilian dagiti maibilang a potential flight risks.
Iti agdama, maur-uray ti ibaga dagiti agkabsat a Yap.
