Imbasura ti Senado ti kiddaw ni Senador Ronald Bato dela Rosa nga aramatenda ti Senate Mansion iti siudad ti Baguio, kaduana ti pamilyana.
Maibasar iti surat a napitsaan idi Marso 12, 2026, kiniddaw ni senador Bato kenni Senate President Vicente Tito Sotto III nga aramatenda ti pasilidad manipud Marso 26 agingga 29.
Daytoy ket tapno pagiananda kaduana ti pamilyana bayat a maisaysayangkat ti CSAFP Cup 2026 Shooting Competition iti firing range ti Philippine Military Academy (PMA).
Nupay kasta, pormal a kinompirma ni Senate Secretary Mark Llandro Dong Mendoza a saan a napatgan ti kiddaw ni Sen. dela Rosa gaputa saan paylaeng a nalpas ti pannakatarimaan ti Mansion house.
Maipalagip a saan paylaeng a nagparparang iti Senado ni dela Rosa sipud idi Nobiembre 11, 2025.
Nagramot daytoy kasaruno ti impormasyon seknan iti maatap a warrant of arrest nga impaulog ti International Criminal Court (ICC) kontra kenkuana.
