UPDATE- Nakamasayag iti Cathedral of the Resurrection, Magsaysay, Avenue Baguio City ti bangkay daydi Cordillera Musician a pimmusay kalpasan a nabangga sadiay Km. 6 La Trinidad, Benguet idi Sabado, March 21, 2026.
Sigun kadagiti otoridad, adda itan iti kustodiya ti pulisya ti agtawen iti 40 a driver ti truck kalpasan a natiliw metlaeng iti napasamakan ti insidente.
Iti agdama, sumangsango iti kaso a “Reckless imprudence resulting in homicide and damage to property.”
Daytoy ket kalpasan nga impila ti pamilya ti biktima.
Maipalagip a nabigbig ti biktima a ni Mr. Ivan Rufino, agtawen iti 40 ken residente iti San Carlos Heights, Irisan Baguio City.
Pagaammo daytoy a maysa a miembro ti ANIDO Band, composer ken musician iti kanta a “Kaman Nina,” “Sungbat,” “Udan”, “Paradaan” ken “Rikna”.
Naideklara a dead on arrival ti biktima sadiay Benguet General Hospital.
Maibasar iti inisyal nga imbestigasyon, pinadas ti driver ti truck nga i-overtake ti maysa a hilux a sarsarunuenna.
Nupay kasta, ditoy metten a nasabatna ti motor a nagluganan ti biktima a nangitunda iti panakadumpar daytoy.
Gapu iti napigsa nga impact, naipurwak ti biktima bayat a totally wrecked ti motorsiklo daytoy.
Nagtultuloy ti panagmaneho ti driver ti truck kalpasan ti insidente.
Nupay kasta, insardengna metlaeng daytoy iti sumagmamano a metro manipud iti napasamakan ti insidente.
Kabayatanna, agladladingit met ita ti sibubukel a Cordillera music community iti ipupusay ti maysa kadagiti talentado a local artistst iti rehion.//mp4
