Inawagan ti Trade Union Congress of the Philippines (TUCP) ti Department of Labour and Employment (DOLE) a mangimandar kadagiti employers nga ipatungpalda ti naing-inget a safety measures iti pagtrabahuan, gapu iti nakaro a pudot nga intuntunda ti Super El Niño.
Iti statement idi Oktubre 20, kidkiddawen ti TUCP ti paid heat-relief breaks, libre nga inumen a danum, umno a bentilasion, heat-stress monitoring ken panagsagana iti emerhensiya kabayatan ti Super El Niño.
Impetteng pay ti grupo a saan koma a makissayan ti sweldo ken benepisio dagiti empleyado no kasapulan a mabaliwanda ti eskediul wenno operasion gapu iti nakaro a pudot.
Kiniddaw metlaeng ti TUCP ti dagus a panagtataripnong iti nagbaetan dagiti pannakabagi ti DOLE ken National Tripartite Industrial Peace Council (NTIPC), pakairamanan dagiti pannakabagi ti employer ken trabahador tapno maaramid ti komprehensibo a plano kontra kadagiti peggad a posible nga ipaay ti Super El Niño, kasta met ti pannakaipakat ti dusa kadagiti kompania a manglabsing kadagiti maituding a pagalagadan.
