Rumrummuar iti inisial nga autopsy report a “drowning” wenno pannakalmes ti rason iti ipupusay ti agtawen ti 25 a security guard, tubo idiay Tacloban, Leyte ken agdama a residente idiay Cruz La Trinidad, Benguet a nasarakan a tumtumpaw iti Balili River, La Trinidad, Benguet idi Marso 22, 2026.
Iti pannakiuman iti Bombo Radyo kadagiti otoridad, posible nga aksidente a natnag ti lalaki iti nasao a lugar.
Innayonda pay a sakbay a napukaw ti lalaki ket naginum daytoy kaduana ti katrabahuanna. Bayat ti panaginum, imbinglay ti lalaki nga adu ti pakaseknan daytoy.
Iti tracking ti CCTV nga impatungpal ti kapulisan, naimatangan a nagtaray pay ti biktima manipod KM4 agingga iti nakatnagan daytoy.
Impetteng met dagiti otoridad nga awan ti intarayan wenno nangsurot iti biktima.
Sigun pay iti nakayuman ti Bombo Radyo, nasipnget ken naruot ti nakapasamakan ti insidente isut gapuna a posible a saanna a nadlaw a Balili River ti nagturonganna a rason ti pannakatnagna.
Maipalagip a naudi a nakita ti biktima idi Marso 19, 2026. | via Bombo Noveh Organo
Iti report ti pulisia, dua a menor-de-edad ti agay-ayam iti asideg iti Balili River idi nakitada ti tumtumpaw a bagi ti biktima.
Dagos a nagsubli dagiti ubbing iti pagnanaedan dagitoy tapno ipaayan ti impormasion dagiti natataengan nga isut nangipadamag kadagiti otoridad.
Nagresponde met a dagos ti BFP-La Trinidad ken LTMPS.
