Nangiyuswat ti Department of Information and Communications Technology -Cordillera iti maysa nga online price monitoruing system tapno bantayan ti presio dagiti gagatangen iti tengnga iti panagngato iti presio dagiti produkto a petrolio gapu iti tension idiay Middle East.
Sigun kenni Jimmicio Daoaten, imanmanehar iti lokal a gobierno iti Baguio City ti nasao a platform nga inaprobaran iti Local Price Coordinating Council iti panangidaulo ni Mayor Benjamin Magalong.
Babaen iti website, mabalin a mangibinglay ti publiko iti presio kadagiti produkto, karaman ti lokasion, oras, ken ladawan kas pammaneknek.
Panggep ti sistema a mapasayaat ti transparency, maamuan ti posible nga “overpricing,” ken matulungan dagiti otoridad ken gumatgatang iti naparpartak a panagdesision.
Iti agdama, sumagmamano a fuel stations ken dadduma pay a produkto ti manarimaan a mamonmonitor iti nasao a platform.
