“Ti maibagak kadagiti annak, appo nga ages-eskwela ket dadiay agagaet da nga ageskwela ta iti kinarigat iti panagbiag kadagitoy nga al-aldaw ket kasapulan iti adal. No awan ti adal, haan ka a mabalin a makapagposipos kas kinyak, kas amada…nagpapatingga ak laeng.”
Daytoy ti balakad ni Mr. Raymundo J. Cosile, 63-anyos a naggraduar iti Dadtuco Elementary School sadiay Suyo, Ilocos Sur idi March 27, 2026.
Ni Mr. Raymundo ti with honor kadagiti tallo nga estudiante a naggraduar iti Dadtuco Elementary School, kaadaywan a pagadalan sadiay Ilocos Sur.
Sigun kenni Mr. Raymundo, saan a nakaadal gapu iti kinarigat ti panagbiag dagiti nagannakna idi.
Nupay kasta, intuloyna ti nagadal tapno dagiti ibagana kadagiti ubbing ket nabagas ken agserbi nga insperasyon kadagiti estudiante a sayaatenda ti panagadal.
“Sapay kuma ta ipateg yo pay ti panagadal ken ipaayyo kuma amin a kabaelan yo tapno iti kasta ket maragpat yo iti amin nga arapaap yo iti biag. Kas kunada ngaruden nga…nga dayta iti kinabaknang tayo a saan nga maala iti siasino man.”
Iti baet ti karit iti biagda a pamilyada a kas iti pannakastroke ti asawana, sumagmamano laeng nga aldaw ti graduationda, naragsak latta a nag-marcha ni Mr. Raymundo kadduana ti maysa kadagiti kasinsinna.
Sigun met kenni Rosemarie Bulsao-Langawan, former newswriter ti Bombo Radyo Baguio ken nagserbi kas Guest Speaker iti nasao a graduation ceremony, ti panageskela ket saan a naibasar edad.
La kitdi adda ti determinasyon ken pursigido ket ituloy latta agsipudta, ti adal ket awan ti pilpilienna ubing man wenno nataengan.//mp4
