Aramaten ti Philippine Army (PA) dagiti baro nga armas iti sidung ti Salaknib Exercises 2026, pakairamanan ti Ascod tanks, self-propelled 155mm artillery, ATMOS (Autonomous Truck Mounted Howitzer System), ken dadduma pay a kagawaan a nagatang para iti AFP Modernization Program.
Naipadas metten dagiti Armored Escort Vehicles (AEV) iti nasao a simulation.
Sigun kenni Philippine Army (PA) Spokesperson Col. Louie Dema‑Ala, mailinya dagitoy kadagiti igam nga immet ti US Army Pacific, Japan Ground Self‑Defense Force, Australian Army, ken New Zealand Army nga agpapada a nangipatulod iti contingent idiay Northern Luzon no sadino ti ayan ti kangrunaan a venue dagiti military drills.
Iti agdama, saan pay laeng a sigurado nu maaramat iti drill ti Typhon Missile System ti US gapu iti pangta daytoy iti regional security iti Asia-Pacific.
Inlawlawag ni Col. Dema-Ala, ti laeng liderato ti Air Force of the Philippines ken United States Armed Forces ti adda otoridadna nga agdesisyon nu palubosanda a maaramat dagiti nasao nga armas iti simulation.
Ti Salaknib 2026 ti addaan kadakelan a bilang dagiti participants manipud narugian ti nasao a panagsanay no sadino agarup 7,000 a suldado manipud iti lima a pagilian, pakairamanan ti Pilipinas.
Gapu iti dakkel nga event, nag-abiso ti Philippine Army kadagiti residente idiay Northern ken Central Luzon seknan iti presensya dagiti militrary trucks, aircraft, ken suldado manipud Estados Unidos, Japan, ken dadduma pay a pagilian a karama iti nasao a drill. //bombokaren.c.s
