Imbutaktak ni sigud a DPWH Bulacan First District Engr. Henry Alcantara iti Sandiganbayan nga agarup 30% laeng iti impaay a pondo ti gobierno ti maar-aramat iti actual implementation dagiti flood control projects.
Sigun kenni Alcantara, kadawyan a makiskissayan ti pondo gapu kadagiti commissions, royalties, taxes, ken retention fees.
Inlawlawagna a tunggal P100 a pondo nga inlatang ti kongreso para iti flood control, P30 agingga P35 ti mabatbati para iti implementasyon ti proyekto gapu kadagiti nadumaduma a kaltas.
Sigun pay kenni Alcantara, maatap a makaaw-awat dagiti proponents iti 30% manipud iti pondo ti proyekto; bayat nga agarup 3% kadagiti contractors.
Kabayatanna, inaklon ni Alcantara a personal a nakaawat iti nagbaetan 1.5% ken 2%.
Inlawlawagna a naiyaplikar laeng daytoy iti flood control projects agsipudta, dadduma kadagiti infrastructure work ket dumanon iti 70% kadagiti nailatang a pondo ti maaramat para iti implementasyon ti proyekto.
Daytoy ti impakaammo ni Alcantara kabayatan ti panagdengngeg iti malversation case a nakairamananda sigud a senator Ramon “Bong” Revilla Jr. ken dadduma pay nga opisiales ti DPWH Bulacan First District Engineering Office.
