Impila ni Senator Imee Marcos ti Senate Bill No. 206 wenno gakat nga addaan panggep a maitantan ti Barangay and Sanguniang Kabataan Elections (BSKE).
Iti nasao a gakat, manipud Nobiembre 2026, maiyakar daytoy iti Oktubre 2027.
Daytoy ket gapu iti posibilidad a saan a makabotos dagiti adu a Pilipino gapu iti nangina a pasahe nga ituntuda ti nangina a presyo ti krudo.
Naipaganetget iti gakat a babaen iti pannakaitantan ti Barangay and Sanguniang Kabataan Elections (BSKE), agtultuloy ti serbisyo dagiti opisial ti barangay.
Malaksid iti dayta, dumanon iti agarup P16 bilyon ti magastos para iti BSKE sigun iti Commission on Election (COMELEC), malaksid pay dagiti kanayunan a gastos iti Philippine National Police (PNP), Department of Education (DepEd) ken dagiti lokal a gobierno.
Sigun iti Senadora, nasaysayaat a maaramat paylaeng ti nasao a kuarta iti pannakaipaay iti pagkasapulan dagiti Pilipino kas iti taraon, krudo ken dadduma pay a serbisyo.
