Dumanon iti agarup-kumurang tallo ribo nga overseas Filipino workers (OFWs) idiay Dubai ti makaawat ti $200 wenno katukadna iti agarup-kumurang P12,062.49 a financial assistance manipud iti Migrant Workers Office (MWO) kalpasan a maawanan dagitoy iti trabaho wenno naapektaran iti “no work, no pay” status sadiay gapu iti tensyon iti nasao a rehiyon.
Sigun kenni Labor Attache John Rio Bautista, daytoy ti umuna a batch ti benepisyaryi kalpasan a naipatulod ti pundo manipud iti Migrant Workers office ti Manila.
Innayon daytoy a limitado pay ti umuna a budget isu’t gapunna a 3,000 pay laeng ti targetda a bilang a makaawat iti umuna a rollout.
Manamnama a mangiplablaak manen dagitoy ti baro nga advisory inton bigat, Abril 28 a karaman ti maysa a link no sadino mabalin nga agregister dagiti OFWs.
Kalpasan a makaregister iti nasao a link, aguray iti tallo nga aldaw tapno maberipikar dagiti impormasyon sakbay a mabagaan ti maysa nga OFW a kwalipikado daytoy.
Mabalin a maala ti nasao nga ayuda babaen iti remittance center nga Al Ansari tapno saanen a kasapulan a mapan kadagiti opisina ti Migrant Workers Office.
Karaman kadagiti requirements iti online registration ket Emirates Identification Cards, Labor card wenno employment contract, ken dokumento a mangpaneknek a naapektaran ti trabaho daytoy kas iti certification manipud iti kompanyada wenno notice of cancellation.
Mapatta-patta a dumanon iti 500,000 Pilipino ti adda ita idiay Dubai isunga namnamanen ti MWO ti dakkel a bilang dagiti agaplikar. //bombokaren.c.s
