Nangipila ni Senador Ronald dela Rosa ti dua a singasing a linteg iti baet iti nabayag a kinaawanna iti Senado.
Karaman ditoy ti singasing a Counter Foreign Interference Act a panggepna a dusaen dagiti gangganaet a makibiang iti pagilian ken mangibangon iti konseho nga agpokus iti seguridad, ekonomia, teknolohia ken militar.
Nangisingasing metlaeng daytoy iti linteg iti National Police Clearance System Act tapno papigsaen ti centralized record dagiti krimen, warrant of arrest, ken datos dagiti wanted ken nakemmeg nga indibidual.
Saan pay a nagparparang iti publiko ni Dela Rosa ken saan a nakipaset iti session iti Senado manipod pay idi Nobiembre 2025 kasaruno dagiti report a mapapati a warrant of arrest kontra kenkuana manipod iti International Criminal Court seknan iti kampania a war on drugs.
Sumangsango metlaeng daytoy iti ethics complaint gapu iti nabayag a panag-absent-na iti Senado.
