Bimmisita ni Public Works Secretary Vince Dizon iti probinsya ti Kalinga idi kalman, Hunyo 1, tapno ag inspect kadagiti nagduduma nga infrastructure projects sadiay partikular idiay Aliog Bridge, road slip area idiay Kinama, Rizal, ken ti mannarimaan a bypass road construction idiay Dilag, Tabuk City
Kabayatan iti inspeksyon ni Secretary Dizon, inbilinna kadagiti contractors ken district engineers a papartakenda ti rehabilitasyon dagiti road slip, pannakakompleto ti bypass road ken ti palpasenda ti baro a rangtay a kasukat ti 58 tawenen a rangtay nga Aliog Bridge.
Nadismaya met daytoy apaman a nakitana a sandbags laeng ti naaramat a barriers iti paset ti Babalag-Kinama-San Francisco National Road idiay Barangay San Pedro, Rizal, Kalinga.
Dagos met nga inbilin ti nasao nga opisyal ti pannakasukat dagiti sandbags iti umno a road safety devices.
Sigun kenni Dizon, binilin daytoy ni President Ferdinand Marcos, Jr. a kitaenna dagiti nagduduma nga infrastructure project iti nasao a probinsya nangnagruna ta mangrugi manen ti panagtutudo ken umadanin ti iseserek dagiti estudyante.
Malaksid gamin kadagiti infrastructure projects, dinakamat ni Secretary Dizon a prayoridad ita ti gobyerno dagiti baro a klasrum para kadagiti estudyante.
Immunan a binisitana ti Liwan West Elementary School no sadino nakitana dagiti nagduduma a pakaseknan pakairamanan ti comfort room, kaawan suplay ti danum, ken daan nga school building.
Impanamnama met ti nasao nga opisyal ti pannakatarimaan ken panakapapintas dagiti nasao a pasilidad sakbay a mangrugi ti klase inton Hunyo 8. //bombokaren.c.sapirao
