Dumanon iti agarup 6,224 a pagadalan iti nagduduma a paset ti Mindanao ti naapektaran iti magnitude 7.8 ginggined idiay Sarangani idi June 08, 2026.
Sigun iti Department of Education (DepEd), karaman kadagiti apektado a lugar ti Zamboanga Peninsula, Northern Mindanao, Davao Region, Soccsksargen, ken Caraga.
Malaksid iti dayta, agarup 3.2 million nga estudiante ken agarup 128,000 a mannursuro ken dadduma nga school personnel ti naapektaran.
Gapu iti daytoy, inwaragawag ni DepEd Secretary Sonny Angara ti pannakasuspender ti klase iti amin a lebel, partikular kadagiti apektado a lugar.
Sigun kenni Angara, nangibaun ti ahensiya iti structural engineers a mangisayangkat iti damage assessment kadagiti pagadalan ken mangipaay iti suporta kadagiti regional teams.
Kabayatanna, binilin ti opisial dagiti amin a pagadalan a nainget nga ipatungpal dagiti addang ken panagsagana iti ginggined.
