Nakairekord ti Baguio-Benguet iti kaaduan a kaso ti Child Labor manipud iti bulan ti Enero agingga Mayo iti agdama a tawen.
Daytoy ket maibasar iti datos nga impakaammo ti Department of Labor and Employment idi kalman, Hunyo 8.
Sigun kenni Ms. Leticia Reyes manipud Department of Labor and Employment-Cordillera, dumanonen iti agarup 1,042 ti nairekord da a kaso ti child labor iti rehiyon Cordillera no sadino nailista ti Baguio-Benguet ti kaaduan a kaso iti bilang nga agarup 379 iti umuna a lima a bulan iti agdama a tawen.
Sumaruno ditoy ti Ifugao iti bilang nga 182 ken Mountain Province iti bilang a 151.
Sigun kenni Reyes, dagiti kangrunaan a rason nu apay nga addu dagiti child laborers ket gapu iti tarigagayda a makatulong iti pamilyada, tumulong kadagiti negosyo ken talon ti pamilyada, ken kaawan interesda nga umuneg iti pagadalan.
Dagiti met kangrunaan a trabaho a sumsumrekan dagiti nasao nga ubbing ket ti Farming, Construction, ken Domestic Work. Gapu ta mabigbigbig ti Cordillera iti agricultural sector daytoy, saan a naawan ti farming sector a pagtatrabahoan dagiti child laborers.
Nu idilig iti datos ti DOLE idi napalabas a tawen, adayo nga inmado dagiti kaso iti child labor gapu ta ti pakabuklan a bilang iti napalabas a tawen ket 1,345 cases bayat nga ita a tawen, lima pay laeng a bulan, nakailistan ti nasao nga ahensya iti agarup 1,042 a kaso.
Impakaammo pay ti nasao nga ahensya a posible a manayonan pay daytoy gapu ta agingga iti bulan ti Mayo laeng ti maireportda.
Manipud 2025, saan met latta a nagbaliw dagiti rason nu apay nga adda latta dagiti child laborers iti rehiyon no sadino ti tarigagay a makatulong latta iti pamilya ti kangrunaan a rason dagiti child laborers.
Mainaig iti dayta. . .
Impakaammo met ti Department of Labor and Employment babaen kenni Leticia Reyes dagiti interventions nga araramiden ti nasao nga ahensya seknan iti isyu ti child labor iti rehiyon.
Sigun kenni Reyes, agtultuloy ti panangipatungpalda iti profiling tapno makitada dagiti kasapulan ken maipaayanda ti tulong dagiti pamilya ken mismo a dagiti child laborers.
Malaksid iti dayta, mangipatpatungpalda metlaeng ti awarding of livelihood no sadino adda dagiti nakalatang a percentages iti budgetda a maipaay kadagiti parentes dagiti ubbing.
Agtultuloy metlaeng ti panangparegtada iti Region Council against child labor no sadino agserserbi kas chair agency ti DOLE. Kaduada ditoy dagiti nagduduma nga partner agencies kas iti Department of Social Welfare and Development (DSWD)
ken dadduma pay nga ahensya.
Iti panagdamag ti Bombo Radyo kenni Reyes nu enya met dagiti addangda apaman nga adda ti maireport kadakuada a kaso ti child labor, inlawlawag ni Reyes ti mannarimaan a papapigsaenda a Referral Mechanism no sadino apaman nga adalenda dagiti kaso dagiti child laborers, mairefer dagitoy kadagiti maseknan mga ahensya depende iti kasapulan dagitoy nga interventions. //bombokaren.c.sapirao (Report by Bombo Jerwin Aquino)
