Impaulogda Senator Alan Peter Cayetano ken acting Senate President Sherwin Gatchalian ti nagsinabali nga advisory para iti work arrangement dagiti empleyado ti Senado ita a lawas.
Iti memorandum a pinirmaan ni Sen. Cayetano a napitsaan idi June 09, imbilinna a regular ti working hours iti June 8 agingga June 11, manipud 8:00 a.am agingga 5:00 p.m.
Iti nasao a pammilin, nadakamat a ti schedule ken maitunos kadagiti probision ti 2024 Collective Negotiation Agreement mainaig iti pannakalagip ti Independence Day inton Hunio 12.
Kabayatanna, nangipaulog met ni Sen. Gatchalian iti sabali nga advisory a napitsaan metlaeng iti June 9 no sadino, napalubusan dagti empleyado iti Senate Secretariat ken Senate Proper nga agtrabaho iti pagtaenganda manipud June 10 agingga 11.
Nailawlawag iti memorandum a ti desisyon ket naibasar iti impormasyon a naawatda manipud kenni National Bureau of Investigation Director Melvin Matibag, seknan iti pangta ti siguridad ti Senado.
Sigun kenni Gatchalian, kasapulan ti panangisayangkat iti security assessment, inspections, ken dadduma pay a safety measures iti uneg ti pasdek ti Senado.
Gapu iti daytoy, temporario a maipatungpal ti work-from-home arrangement iti dua nga aldaw.
Nupay kasta, inlawlawag ti advisory a mabalin a kasapulan pay laeng a sumrek iti opisina ti sumagmamano nga empleyado a karaman iti security, maintenance, ken dadduma pay a kasapulan a serbisio.
