Dumanonen iti agarup 30 nga indibidual ti naibalud ken nakasoan a mammanday linteg, DPWH officials, District engineers, ken contractors gapu iti korapsyon iti flood control ken dadduma a public infrastructure project iti pagilian.
Sigun kenni Department of Public Works and Highways (DPWH) Sec. Vince Dizon, maawatan ti administrasyon ti panagpungtot ti publiko gapu iti dakkel a korapsyon.
Nupay kasta, kinunana a kasapulan ti panagannad ti gobierno iti panangipila iti kaso kontra kadagiti nairaman.
Sigun pay kenni Dizon, saan a nalaka ti panangisayangkat iti case build-up ken agsasaruno nga imbestigasion, isu’t gapuna a siguraduen ti administrasion a saan a basta maibasura dagiti kaso a maipila kontra kadagiti nairaman iti korapsion.
Kabayatanna, inkari ti nasao nga opisial nga ad-adu pay nga indibidual ti maibalud ken maidarum bayat nga agtultuloy ti case build-up ken referral iti Office of the Ombudsman.
