Ilepleppas itan ti Philippine National Police (PNP) ti security preparations para iti umadani a Senate impeachment trial ni Vice President Sara Duterte.
Sigun kenni PNP chief Gen. Jose Melencio Nartatez Jr., maisagsagana dagiti police units tapno masigurado ti linak ken urnos iti aglawlaw ti Senate complex bayat a mataginayon ti regular nga operasyon ti law enforcement operations iti Metro Manila.
Idaulwan ti National Capital Region Police Office (NCRPO) ti security effort.
Nupay kasta, makiddaw metlaeng ti tulong dagiti dadduma a PNP units tapno umdas ti pwersa ken masustiner ti security rotations kabayatan ti proceedings.
Sigun kenni Nartatez, agtultuloy ti pannakikoordinar ti PNP iti Office of the Senate Sergeant-at-Arms tapno masigurado ti nagkaykaysa a plano ti seguridad iti uneg ken ruar ti Senate complex.
Nupay kasta, impaganetgetna nga agtalinaed dagiti polis iti ruar ti Senado malaksid no makiddaw ti panagresponde dagitoy kadagiti emerhensia wenno dadduma pay a saan a nasayaat nga insidente.
