Ad-adalen itan ti Senado no kasano a mapapartak ti impeachment trial proceedings a saan a maapektaran ti dadduma pay a napateg nga aktibidad ti gobierno.
Sigun kenni Senate President Sherwin Gatchalian, mapattapatta a pito agingga walo a bulan ti impeachment trial ni Vice President Sara Duterte.
Daytoy ket no mangrugi ti trial inton Hulio 6, ken posible nga agpatingga iti Pebrero 2027.
Nupay kasta, inaklon ti Senate President a narigat ti eskedyulda gaputa maigiddan kadagiti dadduma pay a napateg a trabaho dagitoy.
Pakairamanan ti saritaan iti 2027 national budget, panagimbestigar kadagiti isyu kas iti flood control projects ken dadduma pay a gakat.
Gapu iti daytoy, ad-adalen ti Senado no kasano a mapapartak ti proseso ti trial.
Karaman kadagiti posible nga addang ket ti nogosasyon iti kampo ti prosecution ken defense a kissayanda ti bilang dagiti saksi ken mapapartak ti pannakaidatag dagiti ebidensia.
Sigun kenni Gatchalian, agarup 10,000 a dokumento ken ebidensia ti posible nga adalenda iti nasao a kaso.
No saggaysa a pagsasaritaanda amin dagitoy, mabalin nga agbayag pay ti impeachment trial.
