Indepensa ni US President Donald Trump ti mapatta-patta a $1.2 bilyon a naurnong iti pamiliana manipod iti cryptocurrency idi napalabas a tawen ken impaganetgetna nga awan ti conflict of interest a napasamak ken naikabil iti blind trusts dagiti kagawaanna.
Sigun iti financial disclosures iti US Office of Government Ethics, nakaurnong ni Trump iti dandani $550 milyon manipod iti World Liberty Financial ken $635 milyon manipod iti licensing agreement iti $TRUMP cryptocurrency.
Kinuna metlaeng iti White House nga awan ti nagbalin a salungasing iti interes iti negosio iti president ken ti pamiliana.
Nupay kasta, nakaawat iti pammabalaw ti dumakdakkel a crypto ventures ni Trump gaputa kagiddan daytoy dagiti addang tapno mapalag-an dagiti pagannurotan iti sektor.
Sigun iti Forbes, dandani triple ti ngimatuan iti kinabaknangna manipod iti $2.3 bilyon idi 2024 paturong iti $6.5 bilyon iti panagdanon iti 2026.
