Agpalpalagip ti Department of Education (DepEd) a maipaayan ti maitutop a pannusa ti siasinoman a matiliwan nga agiwarawaras ti bomb jokes wenno pangta a kadagiti pagadalan.
Daytoy ti ballaag ni DepEd Assistant Secretary for Governance Roger Masapol, kasaruno dagiti report mainaig iti bomb threats ken prank calls a maaw-awat dagiti pagadalan, sumagmamano nga aldaw kalpasan ti napasamak a pammaltog sadiay San Jose, Tacloban.
Sigun kenni Masapol, saan a maawat iti pagadalan ti maysa nga estudyante a matiliw nga agiwarwaras iti bomb threat.
Maipaima ti estudyante kadagiti otoridad para iti intervention ken mai-refer iti DSWD no minor de edad wenno maiturong iti PNP no agtawen iti 18 agpangato.
Inyunay-unay ni Masapol a saanna kayat a sawen a saanen a makaadal ti natiliwan nga estudyante agsipudta, mabalin nga ag-enroll dagitoy iti dadduma a pagadalan.
Kabayatanna, impaganetget ti opisyal ti DepEd a dakkel metlaeng ti responsibilidad dagiti nagannak iti pagimbagan dagiti ubbing.
