Kinumpirmar ti Tayum Municipal Station iti Bombo Radyo Baguio nga nakemmeg ti school principal a maitudtudo nga ada iti likudan iti ipupusay ti agdadagsen a mannursuro idiay Abra idi Mayo ti agdama a tawen.
Sigun iti report ti kapulisan, inarestarda ti suspek a maysa a principal, agtawen iti 56 ken residente ti Brgy. Poblacion, Lagangilang, Abra idi Hulyo 14 pasado alas singko ti malem idiay Presentar Elementary School, Barangay Presentar, Lagangilang, Abra babaen iti bileg ti Warrant of Arrest nga inisyu iti Regional Trial Court, Branch 58, Bucay, Abra iti kaso a murder nga awan piyansana, ken attempted murder iti isu metlaeng nga aldaw.
Nabigbig metlaeng daytoy kas No. 1 Top Ten Most Wanted Person iti Provincial Level ti Abra.
Balligi ti pannakaarestar ti nasao a suspek babaen ti panangidaulo ti Tayum Municipal Police Station ken pannakitinnulong ti PIU/PDEU, 1504th MC RMFB 15, 1ST PMFC,Lagangilang MPS, ken Lacub MPS .
Maipalagip nga idi rabii ti Mayo 8 iti agdama a tawen, naaddaan iti shooting incident iti paset ti Abra-Kalinga road partikular idiay Bumagcat,Tayum, Abra no sadino pimmusay ti agdagdagsen a mannursuro a ni Maria Elaine Valencia.
Sigun iti imbestigasyon dagiti kapulisan, nakamotor ti biktima kaduana ti asawana ken dadduma pay a kakaduada paturong iti maysa a bus terminal.
Apaman a nadanonda ti nakapasamakan ti insidente, killaat a nagparang ti dua a lalaki a saan pay a nabigbig a nakasakay iti motorsiklo sada pinaputokan dagiti agasawa iti maminlima a daras.
Kas resulta, nagsagrap ti biktima iti dua a gunshot wound iti makanawan a luppo na, maysa a gunshot wound iti makanigid a luppona, ken maysa pay a gunshot wound idi makannigid a paset ti tiyan na.
Naitaray met ti biktima iti pagagasan ngem pimmusay metlaeng daytoy gapu iti nasagrapna a sugat.
Agtultuloy met ti hot pursuit operation tapno makemmeg dagiti suspek ken mannarimaan metlaeng ti imbestigasyon seknan iti motibo iti nasao a krimen.
Iti agdama, adda iti kustodiya ti Tayum Municipal Police Station ti suspek para iti dokumentasyon sakbay a maiturnover daytoy iti maseknan a korte. //bombokaren.calpoe.sapirao
