Inreklamo dagiti Concerned Citizens kenni President Ferdinand Marcos Jr. ti baru a Secretary ti Department of Health (DOH) a ni Jose Britannio Pujalte Jr.
Iti maikadua a panid ti reklamo a naisubmiter iti Presidential Complaint Center, inreklamo ti nasao a grupo a maatap a masansan a makitkita ni Pujalte nga agsugsugal kadagiti Casino ken agar-aramat iti Alyas a “Louis Santos” ken “Louis Santoss.”
Maibasar iti reklamo, ti maatap nga aramid ni Pujalte ket panaglabsing iti Presidential Decree No. 1869 a mangiparparit kadagiti opisyal ken empleyado ti gobierno nga agsugal.
Karaman metlaeng ditoy ti panaglabsing iti Code of Conduct and Ethical Standards for Public Officials and Employees (RA 6713) ken ti linteg kontra iti ilegal a panagaramat iti alyas ken regulasyon ti Casino.
Kabayatanna, nakalanad iti reklamo ti kiddawda a mangisayangkat ti gobierno iti pormal nga imbestigasion babaen kadagiti maitutop nga ahensia, pakairamanan ti panagkolektar kadagiti CCTV footage, registration records, ken dadduma pay a dokumento manipud kadagiti casino ken regulatory bodies.
Kiniddaw pay ti grupo ti pannakaipakat ti preventive suspension ken ni Pujalte bayat a maur-uray ti imbestigasion, kasta met ti dagus a pannakaikkatna iti opisinana no mapaneknekan dagiti alegasion.
