Pinalagipan ti Philippine National Police (PNP) dagiti kameng ti ahensiya nga agbalin a responsable iti paltog dagitoy, nangruna no saanda a naka-duty ken adda iti pagtaengan dagitoy.
Sigun kenni PNP chief Gen. Jose Melencio Nartatez Jr., kasapulan a masigurado a natalged ken saan a madanun dagiti ubbing ken dadduma pay nga indibidual ti paltog.
Daytoy ket kasaruno ti dua nga insidente ti pammaltog iti uneg ti pagadalan.
Iti dua nga insidente ti pammaltog, maatap nga inaramat dagiti estudiante A suspek ti service-issued firearms ti kabagyan wenno nagannak dagitoy.
Imbilin pay ti PNP kadagiti police commanders ti regular a panangipaulog kadagiti palagip mainaig iti umno a panagannad ken panagsungbat bayat ti unit briefings ken formations.
Kabayatanna, kinuna ti hepe ti PNP a mangilatang ti organisasion kadagiti personnel ken alikamen para iti nationwide school safety drills ti Department of Education a naituding inton Agosto 25.
