Binabalaw ti Palasyo Malakanyang dagiti opisyal a siuulimek kadagiti isyu ti teritoryo ti pagilian a kas iti West Philippine Sea, nangruna dagiti maatap nga immawat iti pasuksok.
Saanen nga innaganan ni Palace Press Officer Claire Castro dagiti nasao nga opisyales.
Kabayatanna, impetteng ni Atty. Castro a saan a rumbeng nga iwaksi no umdas ti ebidensiya iti alegasyon ni sigud a senador Antonio Trillanes nga immawat da Vice president Sara Duterte ken ti asawana a ni Atty. Manases Carpio iti kuarta manipud iti gobierno ti China.
Inyunay-unay ni Castro a maibilang daytoy a panangliput iti pagilian ken dagiti Pilipino, nangruna no opisial ti gobierno.
Sigun kenkuana, naulimek dagiti sumagmamano nga opisial ti gobierno no maipapan iti isyu ti teritoryo ti pagilian agsipudta napasuksokan dagitoy ti kuarta.
Kinuna ni Castro a saan pay a nangisumitir ti administrasyon iti pangngeddeng ngem masapul a maipakaammo iti publiko no adda ti umdas nga ebidensya.
