Binombaan manen ti China Coast Guard iti water-cannon ti BRP Datu Dumangsil nga adda iti asideg ti Bajo de Masinloc idi July 23, 2026.
Sigun kenni Rear Admiral Jay Tarriela, pannakangiwat ti Philippine Coast Guard (PCG) para iti West Philippine Sea, manarimaan ti panangipatungpal ti PCG ken Bureau of Fisheries and Aquatic Resources (BFAR) iti “Kadiwa ng Bagong Bayaning Mangingisda program.”
Nairanta ti programa a mangipaay iti fuel subsidies ken seguridad kadagiti mangngalap a Pilipino iti laksid ti illegal, coercive, ken agresibo nga aramid ti China Coast Guard (CCG).
Nupay kasta, kellaat a binombaan ti maysa a barko ti CCG iti danum ti BRP Datu Dumangsil a nagpaut iti nasurok a dua a minuto.
Kabayatanna, maysa pay a barko ti China (CCG 21579) ti bimmallasiw iti sangoanan ti BRP Datu Paiburong, sumagmamano nga oras ti napalabas.
Iti baet nga awan ti nadangran, kinondenar ni Tarriela ti inaramid ti CCG a panaglabsing iti COLREGs ken pangta kadagiti Pilipino.
Kabayatanna, namonitor ti siam a barko ti CCG, dua a Chinese militia vessels ken maysa a barko ti PLA-Navy iti nasao a lugar West Philippine Sea.
Impaganetget ni Tarriela a ti Bajo de Masinloc ket maysa a paset ti teritorio ti Pilipinas, ken agtultuloy a suportaran ti PCG ken BFAR dagiti mangngalap a Pilipino kas naibasar iti UNCLOS ken ti 2016 Arbitral Award.
