Inakusaran ni Senate Minority Leader Alan Peter Cayetano ni Senator Panfilo Lacson iti panangbutbuteng kadagiti kontratista a karaman kadagiti infrastructure project idiay Taguig City iti tengnga iti imbestigasyon iti nasao nga isyu.
Sigun kenni Sen. Cayetano, kabaelanda a palampasen dagiti babbasit nga addang kas iti panangkiddaw ni Sen. Lacson a maimbestigaran dagiti proyekto iti nasao a siudad kasta metten ti panangkiddawna kadagiti dokumento ngem impettengna a sabali metten a saritaan nu ni Sen. Lacson mismo ti makibiyang iti panangaramid kadagiti affidavit nga iparangna a nagapu kadagiti kontratista.
Sigun kenni Sen. Cayetano,maysa daytoy a wagas ni Sen. Lacson tapno pumabor kenkuana dagiti testigo kas iti inaramid ni Lacson kenni Department of Public Works and Highways (DPWH) Secretary Vince Dizon, nga immunan a nangpaneknek nga awan ti anyaman a ghost project idiay Taguig.
Iti baet dayta, impeksa ni Cayetano a saan daytoy a mabuteng kadagiti pammutbuteng ni Lacson ken nakasagan daytoy a sanguwen dagiti anyaman nga alegasyon.
