Impetteng ni House prosecution panel adviser ken spokesperson Ace Barbers a posible a nasurok iti P817.8 million ti saan a mailawlawag a kinabaknang ni Vice President Sara Duterte.
Sigun kenni Barbers, inaramat ni forensic financial analyst Atty. Alexander Cabrera ti konserbatibo unay a pattapatta iti potential revenues a mapatpataud dagiti kompaniya a nainaig kenni Duterte ken ti asawana a ni Atty. Manases Carpio.
Nagserbi ni Cabrera a testigo iti impeachment trial ti bise presidente idi Biernes.
Sigun kenni Cabrera, na-total ti P817.8 million a saan a mailawlawag a kinabaknang dagiti Duterte babaen iti bank records, financial documents, ken Statements of Assets, Liabilities and Net Worth (SALNs).
Kabayatanna, impaganetget ni Barbers a dagiti pinansial a rekord nga adda iti prosekusyon ket mabalin a saan a daytoy ti pakabuklan a kinabaknang nga iggem wenno naawatda Duterte ken Carpio.
